|
Manifestua |
|
URAREN KULTURA BERRI BATEN ALDEKO EUROPAKO MARTXAK |
|
Erakunde
antolatzaileok aldarrikatzen dugun Plan Hidrologiko Nazionalak
(PHN) honako helburuak izan beharko lituzke: gaur egungo
politika hidrologikoaren modernizazioa, ur eskariaren kudeaketa
txukuna eta baliabide urri honen zenztuzko banaketa, Europako Batasunak onartu berri duen Ur Araudiak
agintzen duen moduan. Zoritxarrez,
Alderdi Popularrak (PP) inposatu digun PHN oso bestelakoa da: 1)
Ur eskaintzaren etengabeko hazkundean oinarritzen da, legez
kanpoko interes espekulatzaileei men eginez eta neurriz kanpoko
ustiapenak gure ekosistema
hidrikoetan izango dituen ondorioei erreparatu gabe. 2)
PHNk segida ematen dio dirulaguntza publikoetan eta herrilan
erraldoietan oinarritutako politika zaharkituari: ehun bat urtegi
handi, ur bideratze eta trasbase aurrikusten ditu. Egitasmo horiek,
Ebroko trasbaseak bezala, kalte handia eragingo liekete ingurumenari,
lurraldeari, bertan bizi direnei eta euren kulturari, Ondareari eta
paisaiari. 3)
Estatuko lurraldeen arteko desberdintasun ekonomiko eta
sozialak areagotu egingo lituzke, gaur egungo desorekak larriagotuz (barnealdea/kostaldea,
mendialdea/lautadak, hiria/baserriak). 4)
PHNk neurriz kanpoko ur eskaria sortuko luke berez ur eskasia
handia duten hainbat eskualdetan. Horrek arazo larriak ekarriko
lituzke epe luzera. Onartezina da ur gutxi duten tokietan
elkartasunaren izenean halako eskaria bultzatzea, jakina baita eskari
horren atzean interes espekulatzaileak daudela. 5)
PHNk areagotu egingo luke gure ibai, aintzira, delta,
ibaiertzeko baso eta mendien narriadura, ez duelako kontuan hartzen
ura ekosistema guztien biziaren eta gure osasunaren eta ongizatearen
funtsa dela. 6)
Plan honek uraren salerosketa du ardatz, PPk eta CiUk aurreko
legegintzaldian inposatu zuten Ur Legearen Erreformaren bide beretik
doa eta. Gure iritziz, ura baliabide publikoa da eta, horregatik,
baliabide hori kudeatzeko orduan herritar guztien interesak hartu
beharko lirateke kontuan. 7)
Planak ez du
aintzat hartzen klimaren aldaketa nabarmen murrizten ari dela gure
baliabide hidrikoak. Etorkizunerako egitasmoak zuhurtziaz eta
errealismoz taxutu beharrean, PHN onartu duten agintariak
axolagabekeriaz ari dira jokatzen. Kalean,
milaka eta milaka herritarrek eskatu dute plana atzera bota dezaten.
Mobilizazio itzelak izan dira, baina, hala ere, Espainiako Gobernuak
entzungor egin die herritarren kritikei eta zientzialarien
proposamenei, eta bere nahia inposatu du CiUren eta Coalicion
Canariaren laguntzaz. Plan
honen onarpenak axolagabekeria handia erakusten du, ez dituelako
kontuan hartzen Europako Batasunak Ur Araudian zehaztu dituen irizpide
eta helburu berriak. Espainiako Gobernuak presa handia zeukan plana
lehenbailehen onartzeko, eta, presaren presaz, Europan indarrean
dauden hainbat Araudi urratu ditu: Habitatena, Hegaztiena… Era
berean, ez du kontuan hartu laster onartzekoa den Ingurumen Azterketa
Estrategikoa. Horrez gainera, nabarmentzekoa da PHNk aurrikusten
dituen hainbat herrilan auzitan daudela gaur egun eta Ingurumen
Ministeritzan ardura handia izandako zenbait kargu epaileen aurrean
ari direla deklaratzen. Egoera
honetan, ezinbestekoa da uraren planifikazioren eta kudeaketaren
inguruan eztabaida zabala bultzatzea. Eztabaida horrek demokratikoa
eta irekia behar du izan, lurralde eta kaltedun guztiek parte hartzeko
aukera izan dezaten. Gure ustez, Europa osoak egin behar dio aurre
herritarren partehartze demokratikoaren arazoari, are gehiago kontuan
izanda Espainiak Europako dirulaguntzak beharko dituela Plan hori
aurrera atera ahal izateko. Hori
guztia dela eta, Ebroko Deltatik Bruselara joango den martxa jarri
dugu abian. URAREN KULTURA BERRI BATEN ALDEKO EUROPAKO MARTXAK honako
helburuak ditu: 1)
Gure arroetako baliabideen erabilera iraunkorra bermatuko duen
planifikazioa. Planfikazioa behar bezala egiteko, nahitaezkoa da
zehatz-mehatz jakitea zenbateko kontsumoa
dagoen gaur egun, eta oinarritzat baliabide guztien kudeaketa
demokratikoa hartzea. 2)
Uraren zentzuzko erabilera, ahalik eta ur gehien aurrezteko
ahaleginak eginez. Banaketa sareetan galerak murriztu, ureztatze
teknika eraginkorragoak erabili, erabilitako ura garbitu eta berriro
erabiltzeko teknikak bultzatu… Hamaika neurri har daitezke ura
alferrik gal ez dadin. 3)
Legeak betearazi. Zorrotz jokatu behar da gehiegizko ustiapenak,
kontrolik gabeko isurketak eta legez kanpoko ur-hartzeak behin betiko
amai daitezen. 4)
Garapen iraunkorra eta orekatua ahalbidetuko duen lurralde
antolamendua, elkartasunean oinarriturikoa. 5)
Gure ekosistema hidrikoak berreskuratzea, hainbeste urteetako
erasoen ondorioz oso hondatuak baitaute. 6)
Kultur Ondarea berreskuratu eta zaintzea. Gure kultura oso
lotua dago paisaiari, eta gure historiari eta kultur adierazpenei
eusteko ezinbestekoa da ingurumena behar bezala zaintzea. 7)
Espainiak eta Portugalek elkarrekin egin ditzatela bi herri
horien arteko arroilen planifikazioa, hala agintzen baitu Europako
Araudiak. Hainbat
aditu independentek azaldu dutenez, Planaren kostuak espero diren
etekinak baino askoz ere handiagoak dira. Horrek esan nahi du Plana
gauzatzeko nahitaez beharko direla Bruselako dirulaguntzak, eta hori
Europatik datozen irizpideen kontra doa. Zentzugabea da Europako sosak
Espainian inoiz izan den atentatu ekologiko handiena finantzatzeko
erabiltzea. Dirulaguntza horiek, gainera, Europako lege politikoak
urratuko lituzkete, eraikuntza enpresen eta konpainia elektrikoen
mesedetan. Dirulaguntzak publikoak izango lirateke, baina etekinak
multinazionalek eskuratuko lituzkete, urarekin espekulatuz. Hori
dela eta, EUROPAKO MARTXA abian jarri dugun erakundeok zera nahi dugu: 1)
Europako fondoak blokatu, PHNk aurrikusten dituen egitasmo
kaltegarrienek Bruselatik sosik jaso ez dezaten. 2)
Europa osoan URAREN KULTURA BERRIAREN aldeko jarrerak bultzatu,
uraren kudeaketa demokratizatuz eta herritarren partehartzea areagotuz,
beti ere garapen iraunkorraren ikuspegitik. 3)
Europako Batasunaren Uraren Araudia zorroztasunez garatu,
hondamendi gehiagorik izan ez dadin. |