Manifiesto

MARCHA UROPEYA PER A NUEBA CULTURA DE L'AUGUA 

MANIFESTO

As organizazions clamaderas rebindicamos un Plan Idrolochico Nazional (PIN) que mudernize l'autual pulitica idrolochica, chestione a demanda d'iste recurso crexienmén escaso e lo distribuiga de traza sustenible en coderenzia con a Direutiba-Bastida d'Auguas aprebada fa poco en a Unión Uropeya (UU).

Desgraciatamén o PIN aprebato que mos ha imposato o Partido Popular (PP) suposa:

1) Una pulitica alazetata en o creximiento contino d'a ufierta d'augua, cuala racada ye una sobresplotazión d'os ecosistemas idricos auspiziata per intreses especulatibos que se bochan impunemeén en a ilegalidá.

2) A continidá d'un enfoque anticuato d'ufierta baxo masiba subenzión publica, alazetato en a costruzión de grans obras idraulicas: un ziento de grans entibos, encauzamientos e trescols que, como l'inchustificable trescol de l'Ebro, prebocareban graus impautos meyoambientals, ta o territorio, t'as presonas que l'abitan, t'a cultura que ístos sustentan, ta o Patrimonio e ta o paisache asoziato a ista cultura.

3) Enamplar as esferenzias economicas y sozials entre distintas zonas d'o Estato, consolidando una ordenazión d'o territorio cada begata más desequilibrata e inchusta entre l'interior e o litoral, entre a montaña e o plano, entre a ziudá e o meyo rural.

4) Fomentar en arias con una grau manca d'augua una demanda insaziable que no podrá satisfer-se, creyando asinas graus problemas sozioambientals a meyo e largo plazo. Resulta inazeutable a chustificazión de tals demandas dende o clamamiento a una solidaridá intresata, per reyalizar-se dende intreses especulatibos e desichir sacrifizios a os más esfaborexitos.

5) Afundar o malmetimiento ambiental de ríos, ibons, deltas, paúls, bosques de ribera, montañas... sin para cuenta en que l'augua, antiparti d'a suya importán funzión economica, ye l'alazet d'a bida de toz os 
ecosistemas e un elemento esenzial d'a nuestra salú e bienestar.

6) Iste Plan suposa empentar a mercatorna de l'augua como nueba clau de chestión, tal e como impusón en a Reforma d'a Lai d'Auguas en a pasata lechislatura PP e CiU. Dende o nuestro punto de bista, l'augua ye e debe siguir estando un recurso publico chestionato en funzión de l'intrés cheneral.

7) S'infrabalura a crexién reduzión d'os recursos idricos á consecuenzia d'o cambeo de l'orache, eludindo asinas a responsabilidá de diseniar un esdebenidero de sustenibilidá dende a prudenzia e o reyalismo.

A penar d'las masibas mobilizazions sozials que desichiban a retaculata d'iste Plan, o Gubierno, con o refirme de CiU e Coalición Canaria ha imposato a gambada melitar nunziata, inorando as creticas e alternatibas proposatas dende amplos seutors d'a comunidá zentifica.

L'aprebazión d'iste Plan suposa per atro costato una grau irresponsabilidá pulitica per cuanto preba d'eludir, en o periodo de transizión que a UU ufre ta trasposar a nueba Direutiba-Bastida, a coderenzia, os nuebos criterios de chestión e os ochetibos que marca dita Direutiba. Per atro costato, o Gubierno, en o suyo afaño d'imposar una aprezisata pulitica de feitos consumatos, bulnera graumén dibersas Direutibas ya bichens dende fa añadas: a d'abítaz, a d'Abes... inorando per atro costato a inminén aprebazión d'a Ebalguazión Ambiental Estratechica. Amás, obras alufratas en iste PIN, se troban en iste inte sub iudice, con importans ecs-altos cargos d'o Menisterio de Meyo Ambién querellatos e declarando debán d'os chuezes.

Debán d'ista situgazión, ye impreszindible ubrir una ampla rufierta sozial con guaranzias de partezipazión en plano d'igualdá de toz os territorios e seutors afeutatos, ubriendo un prozeso de democratizazión reyal d'os organos de partezipazión relazionatos con a planificazión e chestión de l'augua en España.

En a combizión de que, en una u atra mida, iste problema de democratizazión e partezipazión ziudadana ye cheneral en Uropa, e dende a combizión de que iste Plan ye irreyalizable sin a masiba finanziazión que España aspera otener d'os fundos uropeyos, lanzamos a iniziatiba de MARCHAR DENDE O DELTA DE L'EBRO DICA BRUSELAS en una MARCHA UROPEYA PER A NUEBA CULTURA DE L'AUGUA ta empentar un desembolique eleutibo d'a Direutiba-Bastida que premita:

1) Una planificazión de l'emplego sustenible d'os recursos d'as diferens cuencas, alazetata en o conoximiento esaustibo d'os consumos reyals de cada autibidá e en la chestión conchunta d'os recursos superfizials e soterraños.

2) Un emplego razional de l'augua cualo exe zentral sólo puede estarque o estalbio, apostando per incrementar sustanzialmén a efizenzia, reduzindo as perdas en os retes de distribuzión, fomentando o emplego de teunicas de regallo más efiziens, a depurazión e reemplego d'as auguas.

3) A implantazión efeutiba d'a legalidá acorando con a sobre-esplotazión, os abocamientos incontrolatos, as cautazions e os xarticamientos ilegals.

4) Una planificazión territorial que empente un desembolique sustenible, equilibrato e armonico, alazetato en o emplego responsable e solidario d'os recursos esistens.

5) A recuperazión d'os nuestros ecosistemas idricos, que dimpués d'añadas d'agresión e desidia se troban muito deterioratos, asegurando a proteuzión efeutiba d'o dominio publico idraulico, a restaurazión idrolochica forestal, a conserbazión d'os ríos, pauls e acuifers, asinas como a reduzión d'a contaminazión.

6) A conserbazión e restaurazión d'o Patrimonio cultural como referén d'os nuestros paisaches e elemento indispensable t'a memoria estorica e a dibersidá cultural, aspeutos que contribuyen ta l'equilibrio y progreso d'a soziedá.

7) A planificazión entegrata entre España y Portugal d'as cuencas compartitas tal e como desiche a Direutiba-Bastida.

Tal e como contrimuestran estudios economicos d'espiertos independiens, os costes d'iste Plan superareban con muito os benefizios asperables, crebantando a lochica economica esfendita per a Direutiba-Bastida Uropeya.
Ixo desiche, como clau d'execuzión, a masiba subenzión uropeya. Tal subenzión no sólo empentareba que o más gran atentato ecolochico nunca aprebato en España, sino que atentareba contra as lais puliticas uropeyas en bigor, en beneficio, una begata más, d'as interpresas costructoras, as eleutricas e as moltinazionals de chestión d'auguas que, en iste causo, á trabiés d'os mercatos d'auguas publicas subenzionatas en os trescols, empentareban os negocios especulatibos que empara o modelo de desembolique insustenible que promuebe o Gubierno.

Per tot ixo, as organizazions clamaderas d'ista MARCHA UROPEYA mos proposamos:

1.- Atrascar os fundos uropeyos d'os procheutos más impautans que imposa o PIN.
2.- Fomentar a partezipazión ziudadana e a educazión per a NUEBA CULTURA DE L'AUGUA en Uropa, democratizando a chestión d'auguas en a perspeutiba d'o Desembolique Sustenible.
3.- Desembolicar en toda a suya fondura a Direutiba-Bastida d'Auguas d'a UU, dende a estreita aplicazión d'o prenzipio de NO DETERIORO en o periodo de trasposizión.

Prenzipios de la Nueba Cultura de l'Augua

MarchaBruselas.com